by Amira Sobeih on Tuesday, February 8, 2011 at 7:46pm
النهاردة كنت على باب نقابة المحامين مع بعض الزملاء وفوجئت برجل فى منتصف الخمسينات دخل علينا أساتذة حضراتكم محامين نظرنا له إحنا الأربعة وقولنا له أيوة..خير؟
قال أنا أخويا مات فى المظاهرات وعايز أجيب حقى أو تعويض أو أشوف ممكن أعمل إيه؟
بصينا له وتبادلنا النظرات وقبل ما ينطق أى حد..بسرعة قال الرجل: والله أنا أخويا مالو فى المظاهرات ولا أى حاجة؟ أخويا كان بيقفل باب المحل وضربوه العساكر بالرصاص قدام عينى فى دماغه..ودى الشهادة أهى طلق نارى فى الجمجمة
أخويا بياع خضار ملوش فى حاجة..قولولى أعمل ايه؟
سكتنا وبصينا ومجبناش منطق...واحد مننا سأله فين تقرير الطب الشرعى أو عملت له تشريح أو فحص جنائى ..أو كشف المعمل الجنائى؟
وقبل ما يحاول يوضح ويكمل ما يقصده أمام فاه الرجل المفتوح، الرجل قاله: مرددوش يا بيه..قلولنا لازم تدفنوه دلوقتى ودفناه..بس دى شهادة الوفاة ومكتوب هو مات ليه...يا بيه....يا بيه ....وسكت الرجل
بصيت له وبكل شجاعة رجعت خطوتين للورا ودورت وشى وسحب واحد من زمايلى ووقفت على جنب وتركت الرجل يتحدث مع زمايلى الاتنين ووقفت بعيد مقدرتيش أشوف أو ابص على شهادة الوفاة ...وقفت ودورت ورجعتين خطوتين (زى ما كتير بيدور وشه وبيتغادى عن كتير ويقولو حرام عليكم ..مش عايزين نسمع عويلكم وصراخكم ..ووقروا كبيرنا واستقرار مصر صاحب الضربة الجوية...دورت وشى ووققفت على جنب لأنى مش قادرة أشوف حاجة تعكر مزاج أهلى العالى)
معرفيش بقية المناقشة وزمايلى قالوله ايه...لكن اللي أعرفه إنى لقيت الرجل واقف وساند على الكورنيش وماسك شهادة الوفاة وبيشوفها وماسك فى ايده التانية بطاقة أخوه وباصص فى الأرض يمكن خايف يرفع راسه فى السماء لأحسن يشوف صورة روح أخوه اللي بتناديه ياخد حقه ممن طغى فى الأرض ..يمكن
لكن الأكيد إنه كل همه وشكواه إزاى يجيب حقه فى الأرض دى
فأنزل يا سيدى الرئيس على الأرض من قصرك ...وأنزل الشارع صدقنى ستكون أول المطالبين برحيلك
No comments:
Post a Comment