Be Cool Protester - حاجات تخليك كوول وإنت بتتظاهر

by Amira Sobeih on Tuesday, February 8, 2011 at 9:11pm


طبعاً بعد وضوح الرؤية وطول المدة ناس كتير بدأت تنزل الشارع، واختلفت الأسباب وإن توحد الفعل والنتيجة إنها النزول فى الشارع، والأسباب كتير واللي كان مش راضى ينزل لأسباب صحية تمنعه حرصاً على نفسيته واللي استجاب لدعوة الريس بحرية التعبير علشان الريس مش هيمسك ولا الأمن هيقبض على عيال المظاهرات، أو اللي نازل علشان مش عارف يشوف العيال بقاله مدة وأهى فرصة، أو اللي نازل من باب الفضول لأن اتخنق ومش عارف الريس قاعد ليه على الكرسي والعيال لسه ليه فى الشارع لحد دلوقتى ...والبنات اللي تحت بيباتوا أهلهم فين..واللي زهق من أخبار النت والفيس بوك وكله بييشتم فى كله وهو عمال بيعضض فى شفافيه من غيظ وطلوع إيمانه من عبقرية التحليلات أو اللي خايف إن ماما تتعود على قعدته فى البيت وغيره...المهم إنه نازل

وعلشان اللي هينزل ياريت ياخد باله من الآتى:

1- أولاً كلنا عارفين الوصايا العشر واللى تم تداولها: متروحش لوحدك، وزجاجة الماية وسندويتش وشيكولاتية وزجاجة عصير، والماسك للإحتياط، وشنطة الضهر، ومنشفة، وتبلغهم فى البيت قبل ما تنزل، وألبس هدوم تدافيك وجاكيت يحميك من الضرب لو متوقع معركة

حطين..وغيره


2- الأخوة الهاى تيك بتوع تويتر: نستخدمه بعقل: مفيش داع لسيل الأخبار، مش كل ماهتشوف يافتة تكتبها وحياة أبوك...حطلك عدد أقصى من التويتس علشان ميقعش الموقع.ومش تنسى تويتر عملوه فى الأساس علشان تبقة على إطلاع بأخر الأحداث الحقيقة على أرض الواقع وليس للقفشات فخفف منهم وخاصة فى أوقات الذروة للمسيرات...واهو الموقع الأزرق ينفع فى اليوم الأسود


3-الكاميرا: وحياتك استخدمها بعقل شوية..مش كل حاجة بتتصور ..وبلاش تزرع الكامير فى وش كل واحد، إنت مش نازل مزار سياحى ومتروحش فى وش الضابط والعسكرى وتبتسم الإبتسامة إياها وتصور...التصوير له غرض..فيا ريت نحترم الخصوصيات..إحنا بنصور أحداث مش أشخاص



4-لو العسكرى أو الضابط وقفك: وحياة كل حاجة عندك خليك مؤدب ..بلاش تستفزه..لاحظ إنه واقف فى الشارع كتير ..سواء شرطة أو جيش..ابتسم وشوف عايز ايه ..أحياناً كتير بتكون لهم توجيهات تنظيمية لأمنك أنت واللي معاك..خلي عندك سنس، وخليك فاكر لو عسكرى شرطة أو جيش طلب تفتيشك استجييب وخليك صاحى وأول ما تحس إنك ممكن تتاخد من قفاك اجرى فالجرى نص الجدعنة (لو فى خطر جدى) أو نبه اللي معاك بطريقة أو بأخرى إنه ياخد حذره(فيبقة واحد يتمسك والتانى يلحق يجرى يبلغ أهله) ..وافتكر الشعار الجديد الشرطة فى خدمة الشعب ..فاحترمه...وطبعاً صاحبك اللي جرى لازم تكون معاك ومعاه رقم تليفون أى حد معرفة محام للضرورة احكام يا معلم..مع إنهم بيتمسكوا هما كمان..وياريت صاحبك اللي جرى يا سلام لو اخدلك صورة من بعيد بعد ما يجرى بالزووم كاثبات..تبقة إن شاء الله هيلاقوك ..مش تقلق



5- إنت نازل تتظاهر وتعبر عن رأيك بس ياريت مش تقطع الهوا والماية عن خلق الله...حاول تتجنب مداخل العمارات: أحياناً فى ناس بتبقة واقفة فى الضلمة..او ناس عايزة تتطلع وخايفة..وبلاش تستفز الناس اللي فى البلكونات هما معاكم وبيشجعوكم أو بيشوفوكم ادعوهم بخفة ودلع لكن مترذليش ...فخلى بالك...بلاش تقف على العربيات وتسند وتريح على الكابوت..وبلاش اللب والسودانى ..خد أكلة خفيفة



6- طبعاً الأعلام والمانشيتات حلوة بس بلاش تتطوح كتير ..خلى الناس تروح بعيونها سليمة ومش عايزين حد يدعى عليك..بلاش الرفس والفرك الكتير..خليك خفيف الحركة ..ولو معاك ناس وهتمسكوا أيد بعض علشان متهوش يبقة لو حبكت يعنى أمشوا بالطول بلاش بالعرض إلا إذا كان ده مسار المسيرة للأسباب التنظيمية



7- دايماً سيب طريق للعربيات تمشى إلا كنت فى أماكن معروف إنها مش هينفع كدة فيها لسبب أو لأخر ...افتكر إن فى أى منطقة سكنية فى كبار سن ممكن من يحتاج لعربية تقله أو ما شابه..تخيل لو مراتك بتولد و100 واحد واقف قدامك هتعمل ايه؟



8- طبعاً العلام والتي شيرتات وغيره من مظاهر المعروفة بتبقة جميلة ومعبرة



9- خليك صاحى فى الزحمة ..ولو لقيت حد بيستفزك خليك أنصح منه وخليك كووول..



10- لو بتوزع منشورات بلاش ترميها وتحدفها فى العربيات مش عايزين ساعتك تتطير عين حد..اتأكد إنك بتديها بشياكة ..وده ينطبق على أى حاجة بقة



خليك شيك وكوول وحافظ على حقك فى التعبير بسلمية وإنت بتتظاهر وبلاش توجع دماغ الناس معاك