الطيب أحسن

دايماً كنت بقولها لنفسى إنتى خليكى فى حالك والطيب أحسن

مفيش حاجة فى البلد فكك ولا حابة تغير يبقة اتغيرى إنتى الأول والطيب أحسن

ملكيش دعوة وانتى مالك...مش محتاجة من الدنيا ومفيش حاجة نقصانى وانا بين أصحابى وأهلى وبعمل حاجة انا بحبها

ده بينفخ وده بيعبط مافى مشكلة ..خليكي الطيب احسن.ولو حاجة حصلت زعقيلك شوية نفسي الشحنة وحلصى والطيب أحسن

وطول عمرى وفوق الـ30 سنة بتربى على كلمة يا بخت من بات مظلوم ولا بات ظالم والطيب أحسن

اللى عايز حاجة هيعملها بس يشتغل على حاله ويضبط المسائل والنتوريكينج مهم واوعى تفتكرى انه نفاق انتى مش هتنافقى خليكي بس فى حالك والطيب أحسن

وأوعى تفتكرى إن دى سلبية مقننة أو جبن أو سكوت عن الحق..إنتى بس اشتغلى على الحاجات اللي تفهمى فيها واللي متفهميش خليه لناسه ..ومن تدخل فيما لا يعنيه رأى وسمع ما لايرضيه والطيب أحسن

ويا ستى ولو الناس كلها بتشتكى يبقة الناس كلها محتاجة تتغير فكل واحد منا يبدأ بنفسه وهنتغير والطيب أحسن

عاجبك العمل الأهلى اشتغلى فى حالك وابعدى عن الخطوط الحمرا واللى غيرها والطيب أحسن

بلاش دى وبلاش ده...فكك من ده وده والطيب احسن

وثبتى الأسس الراسخة من الأخلاق علشان تكبر العواميد وتبقة منارات بقدرة قادر...والطيب أحسن

وبقيت طيبة علشان ابقة أحسن..لكن لقتنى لسه خايفة والكل خايف ومن أسوأ لأسوأ ومجتمعى أسوأ لأسوأ...وكله بينافق واللي يقول غير اللى على هوا السلطة مجنون واخرق ونقرا الفاتحة.....والكل بيتفنن فى وضع المحاظير من باب من زاد وفى...ةكلْ بيرمى بدلوه إزاى نقدر نخنق أكتر لأنها أكيد هتفرج عليا كل ما خنق أنا...والشغل كدة إزاى اللي بايده يخنق بحاجة على التانى يخنق بيها علشان يظهر انه إزاى متفانى فى خدمة رب العمل أو المدير...وحتى بيوتنا بقت كدة...والكل بيجرى فى سباق الحياة المسعور إننا نجيب فلوس نعمى بها العيون...ومبقيناش نربي عيالنا علشان عارفين إنها ملهاش لازمة ...وكبرنا وسط الناس واحنا بنربي بعض ...اعمالاً بمبدأ اللي مربهوش أهله هتربيه الناس,,,واقول طيب لكل حاجة لأنه الطيب أحسن

فياريس ارحمنا بقة خلاص كفاية كدة ...قعدنا نقول هنرمم هنرمم لغاية لما هرمنا

إنت شخت وشاخت معاك إرادتنا ...وشاخت معاها أحلامنا ومفيش امل وخلاص مينفعش تقويم ولا بقت عمليات تجميل ولا صبغة ولا حتى فوتو شوب نافع ,,,نحسن الصورة بيه شوية

يا ريس مش حاجة لشخصك لكننا محتاجين نشوف خلق جديدة تجدد معاها خلق الناس وأخلاقهم

خلاص الناس جابت أخرها من كل حاجة وحتى الأمل فى التغير أتوئد قبل ما يتولد

حركة التغيير الوحيدة اللي شايفاها فى مجتمعنا: هى للخلف در
!!!!!!

النفاق زاد من كتر ما حاولنا نستر عيوبنا ونجيب أغطية نغطى نفسنا بيها فلابسنا العمم والخيم والطرح وقلنا الطيب أحسن وبرده مفيش فايدة

مازلنا عرايا ومش مستورين وكل من هب ودب بيتحرش بينا من جميعه بدئاً من التحرش الجسدى والفكرى والنفسى وحتى البصرى والسمعى

فخلاص معليش خليها عليك المرة دى إنت بقة..وخلى الطيب أحسن وخليها تيجى منك إنت

ويا سيدى يا بخت من بات مظلوم ولا بات ظالم ..ده الطيب أحسن

حب عادى

مسك إيديها وخطف قبلة سريعة وابتسم ببطء ورفع عينيه وهو بيتأملها ...وهو بيتفرج عليها وهى بدوب بين إيديه ...وبيشوف نفسه بيعيش اللحظة وبيسبل ...وقعد شوية يتأمل ملامحها ...مش حلوة خااالص ومش عاجباه ..بس مش عارف فيها حاجة إيه هى...نفسه يعرف

وأتامل قالها تعرفى إن فى بنات كتير حلوة بس من غير طعم...وعض شفافيفه إخس هو أنا قلتها بصوت عالى ..ولا لسه فى مقولتهاش...وبسرعة ضرب بطرف عينه ملامحها وهى غرقانة من الكسوف...يا نهار أبيض دى شكلها مسمعتيش أساساً...وأبتسم أوى من سذاجتها ..واللي احتار هى سذاجة ولا برراءة ولا حاجة تالتة أو رابعة ..مثلاً بلاهة أو غباوة

وسرح فى كل أوبشن وانعكاساته على العيال..وقالها تعرفى أنا مش عايز أخلف
!!!!

أوبسس دى أكيد قالها....وأكيد هى سمعتها

بصلهاا وسكت رد فعلها...ولكنها فضلت ساكتة تتأمله ولقاها بتبتسم هى كمان..ومفهمش يا ترى ده غباء ولا هى كمان بتفكر وبتسأل نفس أسئلته بس عليه....أوبااااا....لا ....لا..لا يمكن

أوعى فكرك يروح لبعيد أنا راجل وصحيح أوى أوى كمان...بس أقولها إزاى دى مش عايز منك عيال أصل الصراحة مش بينلك شهادة ضمان
!!

بصى شايفة الأتنين اللي هناك دول ..تفتكرى كام سنة..12 ولا 14 ششكلهم ميزيدش عن 15 سنة...تربية الأولاد أصعب حاجة ..مش كدة...فكرة المسئولية والإنجاب مرعبة


وانتظر ردها لكن فوجئ بيها مش ممانعة وبتسمعه...واستغرب...لأ دى غبية غبية بجد...ولا بتلعب بذكائى...أعرفها إزاى دي.......مممم

اتكلمى ..فهمينى أنا ليه قاعد هنا معاكى وبعمل ايه....مترن يا تليفون الغبرة...خلاص مفيش حد عايز يقولى حاجة...حتى نداء الطبيعة رافض يندهنى ...وابتسم ابتسم جداً لما اكتشف إنه مش قادر يقوم حتى


وبصلته قلتله تحب نقوم؟

ايه ده يا خوفى يا بدران ...أتاملها متخلينا شوية حابب نقعد

وأتأملها وهى بتتكسف وبتدخل جوه نفسها فى حركات لولوبية متكورة والمفروض يفهم منها إنها مكسوفة وبتتقل ..وهى بتوشوش نفسها كأنه حاطط ودنه فى بقها مثلاً: لا خلينا نمشي أحسن نتأخر
!!!

قالها أوكى زي ما تحبي..متر متر من فضلك

وابتسم وهو بياخد نفس عميق يااااه خلصنا القعدة ...وشافها وهى بتبتسم وبدوب فى مكانها...وأخدها من ايديها وهو حاسس براحة بس مش أوى..مش مبسوط ولا مضايق ...بس عادى...بس الأكيد انه هيروح البيت وأكيد هى كمان ..وأهو يوم عادى فى مشوار حبه العادى فى حياته العادية جداً...التى تاهت فى زحمة الدنيا ...وعادى يعنى

Alex Rough Waters -Action Movie - أنواء قاسم السكندرية

بعد أعمال التجديد والتحديث بكورنيش الإسكندرية الأسمنتى ..خلاص البحر قال كلمته واعرب عنها بالصوت الحيانى فى أنواء قاسم للسنة دى

!!!


ارحمونا من الكورنيش الأبسمنتى والأرصفة العالية اللي هتدخل موسوعة جينز فى تكسير أربطة الركب الخشنة لكبار السن وغير كبار السن


واللي غالباً البحر مش هيكسر بخاطر محافظ محافظتنا وهيدخله موسوعة جينز فى اول رئيس بلدية يصمم مجارى طافية لسباحة الغوص العميق فى البحث عن رصيف ...بدل الرصفان اللي غرقت تحت الماية واتفتت


اتفرج على:

Alex in Rain -Rough Waters action .mp4
Part 1: http://www.youtube.com/watch?v=0E-5sJO3SnY

Part 2: when we stacked over there
http://www.youtube.com/watch?v=bsG0elIV_TY


فين أيام لما كنت صغيرة شوية كدة وكانت شوارعنا الأسفلت فيها مش كله أسفلت كدة كانت مربعات ..وكانت كل الأرصفة بلا استثناء صغيرة وعلى طولها فى مزاريب بتاخد الماية لفتحات بعيدة مش زى البلوعات اللي فى نص الطريق تاخدك وتاخد عربيتك بالهدر المتين..أظننا محتاجين نعيد نظر ونرجع اسكندرية القديمة ببيوتها اللي كان فيها تدفئة مركزية بالغاز والأسانسيرات المفتوحة الى عمرها ما كانت ما بتتعطل وإذا عطل أى واحد منها كانت عندك العجلة المانيول تلف البكرة بايدك...ومش محتاجة أفكر قد ايه كانت بتنفع خاصة مع ناس اللى بتعانى من فوبيا الأماكان المغلقة...وكانت اكيد مفيهاش حالات تثبيت


أفتكر أول من قدم لى الفكرة: عبدالله صُبيح ،عند تنظيمه لأحد الندوات فى "نادى الفى أو إيه" كرئيس لأحد اللجان تمهيداً وتعريف بنتائج أحد المؤتمرات المعنية بالمياه فى أواخر التسعينات عن المياه والسكان، وةلذى تم عقده فى القاهرة وقتها، ومن بعدها بدأت الأخبار ومتابعتها وأفتكر إن المرحوم/ عادل أبو زهرة -عميد العمل التطوعى البيئى فى مصر من وجهة نظرى- الله يرحمه- قد حدثنا ونحن صغار كثيراً ونادى بفكرة إعادة ترسيم الاسكندرية وكان من أشد المعارضين لفكرة إعادة ترسيم وتوسيع الكورنيش ورفع دعاوى قضائية ضد المحافظة فى التسعينات ضد تلك مقترحات المشاريع من اعادة الترسيم وضد مشروع سان استيفانو ...واللي كسب بعضها بالفعل مما دفع القائمين على مشروع سا ستيفانو باعادة بعض التصميمات وخاصة بتلك المتعلقة بالمارينا واكافيهات الشاطئ واللي تم انشاؤها بعد وفاته وتقاعس العاملين بالبيئة من بعده أو بالأحرى غياب من يشغل مكانته ..واللى غرق بالفعل بعضها فى أخر أنواء اجتاحات اسكندرية -مثال ما حدث فى "لاتينو"

http://www.facebook.com/album.php?aid=311610&id=594902149&fbid=10150103426932150

وغيره نادوا بفكرة غرق الدلتا لكن المسئولين فى مصر كانوا دايماً بينفوا ده على أساس إن الفكرة مجرد اشاعات ضد مصر وابتزاز جهات أجنبية


وحسب بعض المصادر بتصرح بخصوص فكرة غرق الدلتا: نفى العديد من العلماء والمتخصصين في معهد بحوث الشواطئ بالإسكندرية وقسم علوم البحار بكلية العلوم جامعة الإسكندرية والمعهد القومي لعلوم البحار والمصايد مسألة غرق الدلتا وأشاروا إلى عدد من النقاط الهامة أهمها:- اعتمدت الدراسات التي أشارت إلي غرق الدلتا علي مجرد رؤية مستقبلية نظرية وعامة عن ارتفاع درجة الحرارة وذوبان الجليد وارتفاع مستوي سطح البحر دون الوضع في الاعتبار العوامل المميزة للدلتا والسواحل المصرية واحتوائها علي حواجز طبيعية مثل الكثبان الرملية والظلال وأعمال الحماية الصناعية.


- أن القياسات التي أخذها أكثر من جهاز بحري مثبت بموانئ الإسكندرية وبورسعيد والبرلس والتي تقيس منسوب البحر علي مدار اليوم منذ عشرات السنين - أوضحت أن متوسط ارتفاع سطح البحر يبلغ 2 مليمتر سنوياً أمام سواحل الإسكندرية والدلتا وأنه لن يتعدي 20 سم بحلول القرن القادم
http://www.aldiwan.org/articles-action-show-id-67.htm


أكد الدكتور محمد عيسى، رئيس الإدارة المركزية لهيئة الأرصاد الجوية، أن الدلتا لن تغرق بسبب ارتفاع سطح البحر، قائلا إن ما تنشره الصحافة بخصوص هذا الموضوع ليس موضع ثقة أو يقين، لأن هناك بعض الجهات التى تمول الترويج لبعض الأفكار، من بينها التسخين العالمى وارتفاع مستوى سطح البحر.

------

على فكرة للى ميعرفيش الأنواء اللي شغالة دلوقتى هى أنواء القاسم..والحقيقة أثبتت إنها قاسم بجد لأنها قسمت اسكنرية وأرصفتها والعواميد...الخ