تذكرة لمن شاء الذكرى: صورة تتشال تتشال معاها هموم

by Amira Sobeih on Sunday, January 16, 2011 at 2:19pm


من كام يوم كدة أو كام أسبوع طلعت علينا شوية قراراات..تصاريح من اللي تخلى الواحد ميعرفش يسرح شعره بعدها من كتر الشد
!!!!!


مثلاُ: طلع موضوع: إنه ستلغى الدعم التموينى لمن زاد معاشه عن 900 جنيه...وعادى كأن 900 جنيه دول هيكفوا شراء: 3 حقن مرضى السكر (والحقنة ب300 جنيه للى ميعرفش)---أو هتكفى لتغطية مصاريف مواصلات أسرة مكونة من 5 أفراد كلها بتركب الأتوبيس بجنيه واحد (يعنى 750 جنيه فقط مواصلاتهم رايح جاى من البيت للشغل أو للمدرسة والعودة فقط)...أو تكفى لتغطية شراء 4 زجاجات زيت و3 أكياس شاى نوعية قشر الخشب و5 أكياس سكر و5 اكياس أروز ومكرونة وواحد كيلو جبنة بيضاء و2 كيلو فول للتدميسه فى البيت و2 كيلو عدس..وطبعاص أنبوبتين بوتجاز واحدة للمطبخ والتانية للحمام)..ولو قلنا خمسين جنيه للماية وخمسين تانية للكهرباء. ..واحسبها كدة يا معلم ..وياريت مش تنسى لوحبيت تجيب الجرنان يوم الجمعة ولو حبيت تروق نفسك يوم الجمعة بصينية بطاطس بالصلصة ....نظراً لغياب الطماطم من الميزانية ..وطبعاً ممكن تحط كارد تليفون ب10 جنيه فى الشهر لكل واحد منهم
!!!!


أو مثلاُ: رفع انابيب البوتجاز إلى سبعة جنية من المخزن يعنى هتتباع فى البيوت بالضعف

أو مثلاً: رفع أسعار الغاز والبنزين

أو مثلا: ترشيح الوزراء لعضوية مجلس الشعب...يعنى البرلمان اللي بيحاكم الحكومة باسم الشعب نصه وزراء

(وطبعاً مش ننسى موقف المرشحين واللي كسبوا عن دائرة المنتزة وقفتهم المشرفة خلف ستائر بيتهم إثر أحداث الكنيسة فى سيدى بشر)

أو مثلاً: قرارات تحويل المدارس القومية إلى تجربيبية

أو مثلاً: زغتة الخرسة وطاسة الخدة اللى أصابت النظام بعد أحداث تونس


أو أو او او


يلا مش ده المهم....جل من لا يسهو ولا يغلط يا سيدى ...مسئول وأخطأ إيه يعنى..مش مشكلة


المشكلة الحقيقية إنى مبقتش أعرف أشيل صورة إيه وأحط مين

...مرة أحط صورة مدرستى اللي صدر ضدها القرار,,,ومرة أحط الصليب والهلال تضامناً مع اللي حصل بعد بيتى بكام شارع...وبعدين ...أحط....وبعدين أشيل ......وبعديـــــــــــــــــــــن يعنى أخرتها إيه


مش شيلة واحدة كانت تبقة أكرم..هى شيلة واحدة صورة واحدة تتشال ومش هلاقى نفسى مضطرة أعمل كدة كل شوية ..بلا وجع الشيلة والحطة ...صورة واحدة لو شلتها بجد تتشال تابوز كتير من حياتنا ..بس أنا وإنت نقوم ونشب ونفتكر لما وقفنا بجد حاجات بتتغير


ومش هقول شعب تونس الرجالة واللي ربنا يكون فى عونهم ويصبرهم (محدش يفتكر إنها سهلة عليهم ...جدعان ولما كلمت أصحابى التونسة كان الرد واحد: بكرة إن شاء الله أحسن....يااه على الرد ..مقلوش إن العصابات بتنهبنا ومش عايزين يقولوا إننا بندفع تمن أفعال عصابات النظام اللي بتحاول تثنينا عن قرارانا...لكن الرد: بكرة أحسن....ربنا وقلوبنا معاكم...بس إرادتكم معاكم أقوى)....لكن هشير على وقفة الأهالى اللى بوقفتهم البسيطة فى أى موقف من المواقف المذكورة فوق غيرت الدنيا

اتفرج مثلا: على اخر قرار الخاص بالمدارس القومية...ناس الطبقة المتوسطة كل همها تعليم محترم وملهاش لا فى السياسة

وانا كنت واحدة من اللى وقفوا وشفت اللي حصل.... ناس بجد ملهاش ولا فى الطور ولا فى الطحين...كل أملها مستقبل أفضل لعيالها..وفئة مش كبيرة فى المجتمع المصرى كام الف من كام مليون...لكن وقفوا وسمعوا الدنيا...وغيروا

شكراً سيادة الوزير...لأنك أثبت إننا ممكن نعمل حاجة وفكرتنا إننا ممكن نقول ونقول: لأ كفاية تخريب تراث وفكر وجيل بنحاول نربيه فى وسط ظروف صعبة يمكن يعرف يشق طريقه لحياة كريمة كنا بنحلم بيها
!!!!!

صورة واحدة بس تتشال تتشال كتير من همومنا معاها


ودى كانت تذكرة إنى ممكن أنا وإنت وهو وهى نقوم ونحسن...بس نرجع تقول: واهى تذكرة لمن يتذكر بقة