حاولت أبعد عنك..حاولت أفكنى منك..حاولت أهرب..حاولت أقتل شريان وريدي اللي بيجري فيه دم حبك...حاولت أنسى إنك جزء منى..حاولت أعمل كأنى مش واخدة بالى من اللي بيحصل حولى
لكن حبك مسيطر...حبك متعربد فى كيانى بيسقينى العلقم كاسات...أشربه وأنا راضية...على أمل إنه جرعات دوائي اللي هتشفينى...وما هى إلا جرعات موتى البطئ فى نار دروب حبك
وأرجع أقول بكرهك..وألاقينى أتمنى إشارة رضا منك فى لحظة إنى أكون شهيدة فى محراب حبك
جربت أهرب وأسافر بعيد..لكن كل سكك سفري توصلنى ليكي من تاني...يمكن متكونيش أحلى البلاد..يمكن أحياناً بحسك مش شايفانى ..بس أعمل إيه ما إنتى الملكة والأميرة المتربعة على عرش القلوب..وعادي لو مخدتيش بالك من وجه واقف وسط ملايين...يمكن ليكي أحباب كتير..لكن أنا معرفيش حبيب غيرك
شمس يومي متعرفيش غير شمسك..وليلي ميعرفيش غير ضي قمرك..فنوري حياتى بحبك..بس مش تكوينى بالعلقم..ده أنا معرفليش حضن غير حضنك..بس أمانة شيلي الجبس أحسن والله عظامى اتكسرت على قسوة قلبك الصلب ...أعشق ترابك اللي جبلي حساسية الجيوب الأنفية من كتر التلوث..وبرده بحبك
ومهمة تذوقت من روايح معرفيش أزكى من ريحتك...ومهما شفت من طعم معرفيش غير طعم نيلك اللي جبلي البلهارسيا..بيقولو فيكي أغاني أسمعها وأقول مين وفين..هم بيتكلموا عن مصر اللي أنا عايشة فيها..والاقي لسانى بيغنيها فى الحمام لا من دار ولا مش عارف ايه..أضبط روحي وهي بتغنيها..وأقول ايه يا نفس متعرفيش إلا تغنى على نفسك وعلى غيرك وأهو كلو بيغنى على كله.. أبنى قصور أحلام مشاريعي من الرملة وألاقي موجة صغنونة بكل عفوية من بحرك تطيرلي القصر..طيب دلينى على شط غير شطك أبنى عليه قصور ي..وكأن مليش الحق إنى أبنى أى قصر حتى ولو كان من رملة...أرحمينى من حبك...حنى عليا..ده انا مهما كان برده بحبك يا غالية
بس أرجع وأقول طول الصبر ينول المنى..وأنتى كل مناى ...ولو مفتحتيش حضنك لي..هعيش وأموت على أمل إن حضنك يحن على أولادي من بعد,.. ومسيري هعوم فى بحر صحاريكي وهضابك..حتى ولو مكنيش فيه غير القشف والجفاف هعوم فى بحر هواك..ما هوا ابن البط عوام يا وزة حياتى..أصلي حلمى بيكي وليكي كبير
----أميرة----
فبراير 2009
No comments:
Post a Comment