Need a Telescop

I am not a futurologist,,,I am not astrologer... I am not astronomer.... I am not a science fiction author ...nor monopoly-er of any science

but I know the side effects of not to use my mind...so plz keep ur atomic waste away, my mind got enough...al.hamdoelah

you don't need a telescope to think deeper thoughts nor to be modernlized....fanzel mn 3la wedany ..we ela al.ga7eem ya aba laheb ..or let me enjoy mine ;)

نصرانية وأفتخر

فى خبر من الأخبار اللي بتعدي علينا كل يوم ..وتجيبلي السكتة القلبية...والدماغية..وشئ من الشلل الرعاش عينة من مثل هذه الأخبار:

"هيئة شملي حائل تقبض على وافد احتفل بحمل زوجته": واللي الخبر بيتناول فيه -على حسب ما جاء فى الخبر "كوبي وباست": تحولت فرحة مزارع مصري احتفل بنبأ حمل زوجته الذي انتظره 6 أعوام إلى كابوس مخيف بعد احتجازه في مركز شرطة الشملي بحائل لعدة ساعات. وكان أشرف قد دعا نحو 200 من أبناء جاليته لحفل نظمه في إحدى الاستراحات بمدينة الشملي (170 كيلو مترا غرب حائل) قبل أن يتدخل أعضاء مركز هيئة الأمر بالمعروف والنهي عن المنكر لتفريقهم واقتياد أشرف إلى الشرطة.

http://www.alwatan.com.sa/news/newsdetail.asp?issueno=3446&id=139273&groupID=0

المهم بغض النظر عن الخبر صحته من عدمه..استوقفنى الجزء ده:أن التعليل الرسمي للخبر من قبل الهيئة /السلطة السعودية الآتى:

قال الناطق الإعلامي في هيئة الأمر بالمعروف والنهي عن المنكر بحائل مطلق السميحان إن أعضاء هيئة مركز الشملي داهموا إحدى الاستراحات التي شهدت احتفال جالية أجنبية أزعجوا جيرانهم، واستعانت الهيئة برجال الأمن لتفريقهم والقبض على المسؤول والقائم بالحفلة.

كما قال الناطق الإعلامي في هيئة الأمر بالمعروف والنهي عن المنكر بحائل مطلق السميحان إن أعضاء هيئة مركز الشملي داهموا إحدى الاستراحات التي شهدت احتفال جالية أجنبية أزعجوا جيرانهم، واستعانت الهيئة برجال الأمن لتفريقهم والقبض عن المسؤول والقائم بالحفلة. وأضاف السميحان: الجالية جهة غير رسمية ولم يصرح لها بالاحتفال، وقال: الحفلة صاخبة ومزعجة للجيران، وتمت إحالة القضية إلى الجهات المختصة.

يا ربي ...لا بجد ...يا ما شاء الله- خلاص وصل بينا الحال فى بلادنا إنى لما أحتفل وأفرح "أخد أذن من السلطات..ممكن أفرح لو سمجت اصل مراتى حامل"!!

يا لهو بالي...ألطم بإيه..

صحيح بما إنى ذكرت اللطم :

هل يسري الأذن أيضاً فى حفل القرح برده، ولا هنا مش هتبقة مشكلة علشان هشغل قران..ماهو الأتنين صوتهم عالي ومع كل إحترامي

لأ وكمان ايه اللي ينقت فى الخبر -على حسب المواطن المصري المتهور والمتجرأ إنه يقول يلا افرحولى يا أحباب (وكوبي وباست برده)-:

أشرف، الذي يعمل بمهنة مزارع في السعودية منذ 12 عاما، عاش ينتظر نبأ حمل زوجته بعد كل إجازة يقضيها معها في صعيد مصر، يقول: عندما عدت للعمل قبل أيام في السعودية نقل إلي نبأ حمل زوجتي فعزمت على الاحتفال وجمع أصحابي واستأذنت أحد أصحاب الاستراحات لإقامة الحفله واشتريت منه خروفا لأولم به. ويضيف أشرف: بعد العشاء، وبحضور أكثر من 200 مصري إضافة إلى كفيلي، قمنا بتشغيل بعض الأغاني، وتفاجأنا بأعضاء الهيئة الذين اقتادوني للشرطة واتهموني بأنني نصراني وأنني أحتفل بـ "عيد مش عارف إيه الكريسمس" حسب تعبيره. ويضيف أنها المرة الأولى التي يدخل فيها مركزا للشرطة، قائلاً "لو علمت بما سيحدث لأجلت الاحتفال حتى أعود لمصر" موضحاً: لم أقتل ولم أرتكب أي خطأ ولم يجرحني سوى اتهمامهم لنا بأننا نصارى ونحن من أمة محمد، ولم نخرج من مركز الشرطة إلا الساعة الثالثة فجرا. وأكد أشرف أنهم لم يزعجوا الجيران وجميع الاستراحات المجاورة سكانها من العزاب والمصريين، ولا توجد منازل قريبة منا، مضيفاً أنه سيتقدم بشكوى لحقوق الإنسان، لتنصفه.

يعنى سؤال يعنى إيه "نصرانى وبيحتفل بالكريسماس"؟طيب ولو هو كده بيوت الناس تتدخل كده من غير لا أحب ولا دستور..بيتجسسوا على الناس فى بيوتها!!

فين دينا اللي بيقولنا السلام...ده أحد أسمائه -عزوجل- السلام..الودود!!

فكرونى بالفتاوى اللى بتحرم التعييد والتهنئة بالكريسماس ... يعنى إيه..جاري وصاحبي عايزة أقوله كل سنة وأنت طيب..بطلت ..حرام..إنسانياً يا اخى ..الله

يبقة ربي اسمه "الودود" وأنا "أضايق" خلقه..بدل ما "أودهم"...يعنى بجد مش عارفة أقول ايه

كل يوم يطلع علينا ناس غريبة بفتاوى وآراء غريبة ومواقف أغرب ويقولولنا مش عارف ايه...يعنى بجد بجد من امتى أصبح التشدد العنصري أحد ملل دين الإسلام؟

(وعلشان محديش يتذاكي عليا..برده فى ناس مش مسلمين عايزين ضرب النار..ودي استعارة مكنية)

الأصولية والعنصرية كلها ألوان قميئة على مراية الجهل والرجعية

دينا جه نصرة للحضارة الإنسانية وإنتشالاً للآدمية من نار العبودية: واللى أشدها العبودية الفكرية والطائفية القبلية

أحداث كتيرة مرت علينا فى الفترة اللي فاتت خلتنى أبكي وأقول حرام عليكم كسفتونا ...كفاية حرام

ولو النصرانية جريمة دلوقتى (تمنع الناس من الإحتفال والفرح وفرص المساواة والحق فى الحب والعيشة الحلوة بتاعة أيام زمان -أيام الفن الجميل - الأبيض وأسود...أيام ماري منيب وفؤاد المهندس-) فانا بقولها أهو وبعلو الصوت: نصرانية وافتخر

نصرانية لأنى مسلمة..أؤمن بعيسي وموسي

نصرانية لأنى مسلمة...أؤمن بنصرة أخوتى فى الإنسانية

نصرانية لأنى مسلمة...أوؤمن بنصرة قيم دين الإسلام ..فهو دين السلام ..كتابة الفرقان..من رب السلام...رب العالمين

======

Amira S.
Tue. March 9, 2010

بنتى ب100 راجل

أخرسي مش عايزة أسمع نفس...حسك عينك أسمع صوتك...نزلى عينك فى الأرض وانتى بتكلمي الأكبر منك...عيب تقعدي وانتى حاطة رجل على رجل قدام الأكبر منك.. البنات المؤدبة متفرديش شعرها فى المدرسة يا بنت عيب... أربطي الكرفت ونزلى الشميز، إنتى فين هنا فى سوق السمك علشان تشمري كمك بالشكل ده..وقفلى الزراير للأخر...إيه دي الجووب فوق الركبة ليه، خلى الماما تكلمنى فوراً، وألبسي شراب تقيل بعد كدة...إيه الدوافر الطويلة دى تتقص فوراً يا سيستر فتكات شيلها الحاجات دي فوراً...تعالي هنا إيه ده فى حد يشيل الكتب كدة؟؟ بقينا خلاص زي الولاد بنربط الكتب بالكرفت؟ يلا البسي الكرفت بلاش قلة أددب...

إيه ده إنتى عايزة ترقصي؟؟ بلا قلة أدب ومسخرة، قومي ذاكري....طيب ممكن ..ممكن إيه؟؟ مش قلت قومي تبقة قومي...يلا ..البنات المؤدبة تسمع الكلام من غير نقاش...بنات أخر زمن

وفى مرة كدة فى ساعة صفا (واللي فى الغالب بتكون فى غفلة من الزمان): ماما..ماما فاكرة حضرتك لما قولتيلي بلاش كذا ..ممكن تقوليلي ليه؟

ههه...وبعدين معاكي لما تكبري هقولك..روحي قومي ذاكري يلا...يلا ...الله يلا يا اميرة
يا ماما ..أيوة حاضر...بس عايزة أقول لحضرتك حاجة واحدة..إحنا فى الصيف...واجازة

(الآباء والآمهات مبيغلبوش): إنتى هتفكرينى انا موجهة يا أميرة...حضري للسنة الجاية يا حبيبتى..أنا مش جبتلك الكتب الجديدة..جري عينك عليهم يلا يلا يا شطورة

بس يا ماما..مش ممكن المناهج تتغير السنة دي

لا لا يا حبيتى ..قلت قومي...يلا ...يلا...مممممم


اتربينا على حاجات كتير منها صح..وكتير منها محتاج إعادة نظر
فى كل الحالات كنت هسمع الكلام (لأنه بمنتهي البساطة أنا لازم اسمع الكلام..وبكل صراحة) بس كنت هبقة مبسوطة وأنا بسمع الكلام وانا فاهمة ليه ده غلط وليه ده عيب

وبالتالي لما كبرنا بنفوجئ بينا بنعمل حاجات ..وإحنا مش متأكدين هى فعلاً غلط...ولا علشان الكبار قالوا كدة..فهى تبقة كدة

يا تري أنا مع أولادي هقولهم كدة ..وهعمل كدة..

وليه دايماً دايماً...إنتى فاكرة نفسك ولد ولا إيه؟؟
ولما كبرنا: إنتى فاكرة نفسك راجل ولا إيه؟؟

بس فى الأوقات المعينة إياها يجي ويتقالك: بنتى ب100 راجل

!!!



=================

Amira S

Mon. 8 March, 2010

ليلي بيعشقك

ليلي بيعشقك ..علشان عارف إنه فجر اليوم الجديد هيشرق على نور حبك

نهاري بيعشقك..علشان عارف إنه نسيم العصاري هيبعتلك سلامي


يومي بيعشق ...علشان عارف إنه هيختم تعبه فى كنف ليلك

شوقى بيعشقك....علشان عارف إنه هيدوب بين أحضانك

ضعفى بيعشقك..علشان عارف إنه هيتحمي فى جناحك

عيونى بيتعشقك ..علشان عارفة إنها هتنور بنور عيونك

كلماتى بتعشقك..علشان عارفة إنه هتسمعلها بودانك


أحلامي بتعشقك...علشان عارفة إنك بطل غناويها

===================
Amira S.
Friday, February 26, 2010