الكمبيالة: هى ورقة تتضمن عند قرائتها على 3 أشخاص: الساحب- المسحوب عليه- المستفيد
الساحب: دائن
المسحوب عليه: مديون (مدين)
المستفيد: هو اللي بيصرف
--------------------------
وعلى حسب ما بتوع القانون بيقولو: إن الكمبيالة هى ورقة يأمرفيها الساحب من المسحوب عليه أنه يسدد مبلغ معين للمستفيد (والمفروض انه بيكون فى وقت معين)،
والسؤال ليه مفترض إن المسحوب عليه يسدد المبلغ ده؟ هو ماله يعنى ..واحد مديون لواحد: يدفع هو ليه؟
العملية ببساطة إنه فى علاقة مديونية سابقة (يعنى دين كان المفروض يتسدد ومتسسديتش...وكدة كدة هيدفع) فده بيخلص لده ...يعنى لو ادينا مثال: أنا سلفت عباس جنيه، وبعدين استلفت من عتريس جنيه تاني: لما يجيلى عتريس يقولى فين الجنيه بتاعى بقوله: روح عباس هيدفعلك
:)
ودنيتنا كدة برده....دنيتنا هى كمبيالة مستحقة الدفع: أحيانا بلاقي نفسي مضطرة إنى أسدد دين غيري..أو أصرف أتعاب مقدم لمصلحة طرف أنا معرفوش
كتير من الأوقات: بلاقنى وقفت فى موقف وأقول: يا رب ذنبي أنا إيه؟ ليه مطلوب أدفع دين مش دينى؟ أو أسدد مستحقات غيري ليه؟ أو أصرف تعويضات عن ضرر سببه غيري؟
وبفوجئ بنفسي أنا كمان بدوري : بظهر الكمبيالة لشخص أخر يدفع هو كمان (تظهير الكمبيالة يعنى أكتب على ظهرها اسم حد تالت يدفع وهكذا)، وهلم جري ماشية الدايرة
وأحياناً الكمبيالة بتجيلي أدفعها ..وألاقينى بدفع الدين كامل مكمل...وهنا بقف كتير...طيب وحقى أنا مين هيجيبوا لى؟
فلاقى-بقدرة قادر يا كريم- الكمبيالة إتقلبت إلى (شيك).
وساعتها بيتغير طرف المسحوب عليه: ويبقة بنك، وهنا بيتيجي قوة الشيك، لأنه لازم يدفع وهيدفع، لأنه مستحق الدفع بمجرد الاطلاع –لأنه بتاريخ محسوب وقدر معلوم – لازم يتسدد
وبنك الحياة مبيسبيش حد...الدين هيدفع هيدفع...وبيدفع بالفوائد كمان...ويا سلام لما الفوائد بتتراكم على الدين الأصلي ...يااااااه الدين بيبقة كبير جداً..والمستحقات بتبقة تمنها غالي جداً
ويمكن علشان كدة بيصرفوا للمتضررين من الحوادث والمصايب والكوارث شيكات (ومش كمبيالات): علشان الشيك مستحق الدفع بمجرد الإطلاع
وبنك الحياة عامل لكل واحد فينا "حساب جاري" : النهاردة أنا مدين..بكرة دائن..بعده مستفيد..وهلم جري
والبنك من فترة للتانية: بيطلعنا على كشف حساب، علشان نراجع حركة ديونا فى ميزان مدفوعات سوق البشر، ولينا دفتر يومية، دفتر اليومية وحسابنا الجاري مفتوح لحد أخر يوم فى حياتنا ، بنسحب منه "على المكشوف" مفيش مشاكل..لكن هيجي اليوم اللي لازم الحساب يتقفل فيه : وساعتها بس بنعرف أنا دائن...ولا مدين
وكل الديون لازم تتسسدد...ومادام كدة ليه أوجع دماغى بتصفية حسابات ملهاش لازمة..ولا ايه يدخلنى فى مهاترات غيري...ووجع دماغى ليه...ماهى حركة التداولات ماشية...وربنا يخلينا البورصة ومراهنتها...ماهى الحياة مراهنات..مرة نكسب الرهان ومرة نخسره..وأسهم رايحة وأسهم جاية..وقيمة الأسهم قوتها الاسمية بتتغير مرة فوق ..ومرة تحت..مرة مبسوط ومرة متنكد..ساعة ضحك وساعة بكاء..ساعة ألم وساعة أمل..حاجة كدة مع حركة الطلب والعرض...وهى دى دنيتنا أخد وعطا.....فيا تري الكشف الختامي بتاعي وبتاعك نظامه ايه...فى دنيا بنعيشها وبتعيشنا...
------Amira------
Sun. 25-01-09
No comments:
Post a Comment