عارفة إنى لسه 28 ونص....لكن عندى إحساس إنى لسه صغيرة...مازالت أحبو على مهد الدنيا....لسه حاسة إنى عايزة أتعلم. لسه حاسة إنى بنت امبارح...وإن قدامى كتير
أحياناً مكالمة بسيطة مع عظيم بتساوى سنين دراسة...بس يا تري بنتعلم الدرس ولا لآ...المكالمة التليفونية إياها لسه بترن فى ودانى يا ربي
بيقولو النظر فى صفحات الماضي مضيعة للوقت...بس فى نظرات معينة ممكن تخلينا نبصر كتير فى مرايا أيامنا الجايةمش شرط إننا نكون ماعملناش حاجة نخجل منها...لكن ممكن نخجل إننا معملناش اللي نخجل منه
مش معنى إن حياتنا مكنتيش فاضية ...إنها تكون كلها مليانة بالحاجات الصح
مش شرط اللي يعيش تحت الشمس...يشوف النور
مش معنى إن رجلينا ورمت من المشي ..إننا كنا بنمشي فى الطريق الصح
مش شرط كل إنجاز حققناه...يكون هو المرادف للمعنى الحقيقي للنجاح
مش معنى إننا حضرنا واتشاهدنا على أحداث عظيمة ...إننا نكون عظماء
فيا تري إحنا اللي بنختار أدوارنا فى الحياة ...ولا هى اللي بتختارنا
يا تري أنا أنا...ةلا حد تاني؟؟؟
الحياة والموت ده شئ بأمر الله...لكن عايزة أبدأ عمري وعايزة أشوفنى وأنا بتولد من جديد..عايزانى أنا مش حد تاني...هم ما خدوش رأيي لما جابونى على الدنيا دى...وافتكرإن من حقى أعلن فجر يوم ميلادى الجديد
No comments:
Post a Comment