لما بكون أنا

ما بحب أكون أنا..بلاقنى أخدنى أمشي على البحر...وأسيب نفسي أسرح فى الماية والهوا..وأشوفنى نجمة بحر فوق الصخره اللي بعيد بتلمع تحت نور الشمس

,لما بحب أكون نفسي...مبعرفيش ليه مبخدنيش واروح النادي وسط الخضرا والهوا.....

لما بحب أكون أنا...بلاقنى أخد نفسي وأعزمها على سندويتيش طع100 سخن ..وأتمشي مع رجلى أعمل شوبينج وأتفرج على الناس وهم بيشتروا الحاجات..والولاد بالأيس الكريم ..والبايعيين بيبعدوهم عن البضاعه علشان متبقعيش

لما بحب أكون أنا...بعزمنى على السنما فى الفترة الصباحي ولا الضهر لما الناس بتكون فى مدارسها ومفيش غير الولاد اللي مزوغين من المدرسة ..وأسيبنى أتفرج على الفلمين ...الفيلم اللي بيتعرض ع الشاشة ...والفيلم اللي بيتعرض برده قدامى

لما بحب أكون نفسي بسمع الكاسيت...وأغنى وأرقص مع نفسي....واتفرجلى على فيلم كرتون..وأشوف يوتيوب ولا فيلم وقصة كتاب واعملى أكله حلوة وعصير..واكل شيكولاتة وايس كريم

ولما بكون انا ...بسبنى مع أغانى عمر دياب القديمة..وشويه منير.....وكمان يانى وعمر اسماعيل...وصباح وورده ...وأشتغل معاهم وأفكر بصوت عالي معاهم

لمابحب أكون نفسي ...بنزل أروح مرسي أبو العباس ..أدخل هناك ...أقعد فى المسجد أتفرج على الناس اللي داخلة ...وأسمع شكاوهام للشيخ...وأغنى مع نفسي آآآآه يا بشر ..وآآآه يا دنيا على اللي فيكي

لما بحب أكون نفسي ...بسيب نفسي مع نفسي تحكيلي وتشكيلي ...وتاخدنى مع افكاري فى ملكوت الله ,,,وتشهدني على خلق الله


---------Amira Sobeih--------
--------أميرة صُبيح----------

Tuesday, December 15, 2009