شفتو ابنى؟

شايف يا أبو العيال ابنك واقف أهو هناك.روح نادي عليه خليه يقف هنا جنبنا

فاكر لما كنت بتغنيله ماما زمنها جايه وإنت محتاس مش عارف تسكته إزاى

ولا لما ودانك طلعت شرار أول ما ختم بعلامة الجوده على بدلة الإجتماع

وفاكر أول يوم له فى المدرسه بالشورت وهو بيغمز للبنوتة بنت الست اللي واقفة جنبي..وانا مش واخده بالي وفى نص هدومي منه

ولا لما نزلت تخلصه من خناقة فى الشارع بعد ما بتجاب جووول... ولا لما العيال بكانت تجري وراه ومتلحقيش تسبقه

وفاكر لما ناظر المدرسة بعتلك خطاب استدعاء ولى أمر علشان الواد بيحرج المدرسين أوى لأنهم مش عارفين يجاروه

ولا فاكر لما ضبطنا فى جيب غسيله علبة السجاير ، ولما سألته ايه ده؟ ، ووهو بيجاوب ببراءة دى بتاعه مدرس الفيزياء طبعاً


ولا فاكر لما قفل على نفسه أسبوع بعد قصة أول حب وأول بمبة اخدها من بنوتة جميلة تقوله لا شكراً ميرسي

و أول سفرية سافرهاورجعوه باللي شافو فيها عباد الله فى بلاد الله .. والحاجات والمحتاجات ..وشخطتك بس كفاية يا ولد ...خلفة أخر زمن !!

وأول مرتب وهو بيحب على ايدك..وبيقولك يلا يا بابا نعزم ماما على السينما بقه

و بنات عماته وخلاته وهم بيتعدلو على دخلته...احم... وبيسلمو "إزيك يا ابن عمتنا شوفت الفستان الجديد"..ورده بتقل: الله..يجنن

وفرحتنا بعروسته وانا بزفلها فارس الزمان وهو بيقولى شوفى يا أمى قمر حياتى واقفه ولا شمس الشموس

والواد العفريت ابنه وهو بيجري يورينا بدلة العيد اللي اشتراها امبارح


والنهارده يوم ما بتزفنا للقاء مالك الملك ..وملائكة رحمته تبارك كل خطوة بيخطيها ابنى على الصراط اللى رفع راسنا عند سؤال ربي من خلفتم فى الأرض يا ابنى آدم؟

نادي عليه يقف هنا جنبنا ده ابننا فرحة أملنا وسبب عزتنا


---Amira Sobeih---
----أميرة صُبيح-----

Dec. 10- 2009