بأمر الجنون

بجد مفيش أجمد من الدكاتره السفاحين المتعطشين للشهره...ولا المخترعين المهابيل المهوسيين بالفضول المقيت...ولا من المدرسين الانتهازيين القاسيه قلوبهم على العيال الغلابه وأهاليهم المطحونيين...ولا من الفنانيين المجانيين اللي بيخرحو بينا عن ما كل هو غير مقبول ..ولا الفلاسفة المتفذلكين..لأن لولاهم كانت حاجات كتيره مكنتيش هتبقه موجوده فى حياتنا للأسف

يعنى بالترتيب كده منخيل عالمنا لو مكنش حصلا الآتى:

1- طبيب جزار مجنون فكر انه يطلع مخ العيان اللي مات تحت ايديه علشان يعرف ازاى بيشتغل المخ .....ومش بعيد تلاقي الدكتور المخبول ده فتح مخ الراجل وهو صاحي ...عادي جدا....أو مثلاً يعنى طلع القلب حطه فى التلاجه علشان يتابعه وهكذا بقه

2- مخترع مخبول ومش عارف يركز ويهدي كده ويصلي على حضره الأنبياء والقدسيين فى العالم فمن كتر زهقه من كل حاجه حوليه جاله هوس انه يفتكس أى شئ جديد وخلاص.....امال إزاى فكروا انهم يعملو مناديل ورق بدل المناديل القماش......ولا إزاى اكتشفوا القاره الأمريكيه ماهو واحد كان قاعد زهقان فى بيتهم مش لاقي حاجه يعملها ...راح قال أروح أشم هوا البحر ...بس قال ياخدله الطريق الدائري ويركب من ع المحور من باب التغير

3- ويا سلام على المدرسين وسماجتهم وغتاتهم واستظرافهم اللي بلا طعم ولا معنى ....ماهم بفضلهم العيال اتخرجت وقررت انه نظم التعليم فاشله ومحتاجه للتطوير وبسبب ده الدول المتقدمه عملت نظم للتطوير المعلمين واعداد مدرسين بيفهمو علشان يطلعو عيال بتفهم

4- ولا الفنانين اللي خيالاتهم الجامحه كانت ما إلا بذور أفكار كتير من الاختراعات والاكتشافات...وتصور امكانيه دراسه أفكار زي فكره وجود كائنات فضائيه وعالم افتراضي من كائنات غير مرئيه ولا فكره انى اطير فوق السحاب والتواصل عبر القارات ...ولا الكسالي اللي فى دنيتنا واللى بسببهم اخترعوا كليات ومدارس أون لاين علشان متكنيش مضطر تنزل من بيتكم كل يوم الصبح الساعه 7 فى عز البرد

5- اما الفلاسفه والمفكرين فحدث ولا حرج ما بيسبوش حد فى حاله أبداً...ولا عواجيز الفرح ...لازم ينقدوا و يجادلو فى أى حاجه وفى أى شئ ....ولازم يطالبو بتغيير كل نظام وتحريك كل ساكن..وإيقاف كل متحرك ...فالمطالبه والتنديد بأى شئ حرك القاده لعمل الانقلابات العسكريه والحركات السياسيه الشيفونيه...وحركت هطرستهم خيال المهندسين لإختراع صواريخ أرض جو ومواتير طياريات وعربيات تاخد الناس دي فى مكان بعيد


ياااااه الحمد لله الذى أنعم علينا بمثل هذه الأشكال المجنونه شاط وطاح فكرهم اللي لولاهم لكانت حياتى فى حاجات كتير مفتقداها


-----------Amira Sobeih-----
------أميرة صُبيح ---------
Sunday, November 22, 2009