أولاً ربنا مع كل الي بيمتحن، بدعيها من قلبي ، وخاصة بعد اللي شفته النهاردة فى الكلية علشان أطلع شهادة قيد بانى فى قسم الدراسات العليا...وبما إننا فى امتحانات فده معناه إن الدكاترة مش موجودين (وده الطبيعي) و كمان موظفين شؤون الطلبة مش فى مكاتبهم....هذا بالاعتبار إلى حرب المائة ختم ودمغة من مبنى لمبنى
المهم ما علينا، لولا الشديد القوي وإنى عايزة أحجز فى كورس ضروري ولازم الورق، وحاجات تانية تخلص، روحت الكلية وأمري لله وكان ما كان
بداية المشوار وفى عز الحر والتلزيق بالعافية بتعرف تشق طريقك قدام حقوق، بين الناس اللزجة المتبتة قدام المجمع وفى الشارع...عادي جدا...هيجي الفرج عند الباب..وبتعدي ..وبتدخل المجمع وعادي..وبتروح للموظف ..وعادي جدا...الدنيا زحمة والناس مستنية علشان تدخل اللجنة أو طالعة من اللجنة...شئ طبيعي الزحمة والعرق المفحفح فى الجو...يا رب احتسبه فى ميزان حسناتك لزوم لقب شهيدة العلم
قضيت فى الكلية حوالي ساعتين، حصل فيهم 5 مشاهد هحكي منهم 4 الآتيين، وأعتذر لو طولت دول ساعتين يا جماعة
وهلخص الاول الخمس مشاهد عبارة عن ايه:
المشهد الأول: موظفين قسم الدراسات العليا: حديث عن حادثة مدرس عمل مشكلة ما مع طالبات (وتقريبا اتكلم عنها عمرو أديب)...ومناقشة عن مأمورية زيارة فى أحد السجون
المشهد التاني: على باب مبنى العميد: ولد وبنت واقفين ومناقشة عن فنون المكياج وأصول العناية بالبشرة
المشهد الثالث. أمام مكتبة التصوير ومجموعة طلبة ومناقشة عن حركات صيفية
المشهد الرابع: عند كشك الدمغة ومجموعة المنافيستو للتلقين عن بعد
المشهد الخامس: على باب مدرج حقوق أمام مكتبة الطالب ومناقشة ودية على مشروع انفصال بين عصفورين
فى البداية أحب أقول إنى مش عجوزة والله ولا معقدة يعنى ..لا أنا شيخة ولا يحزنون...ولا بحب اسمع لأحاديث غيري أو أتدخل فى اللي مليش فيه ...بس أول مرة أخد بالي من الكلام ده ..بلأنى داايما كنت بروح الامتحان متاخرة بنص ساعة كدة..فيظهر كان بيفوتنى كتير من احاديث الطلبة على باب اللجنة
طبعا المشاهد كانت متقطعة لزوم المشورة رايح جاي بين المكاتب...وأعتذر يا جماعة لأنى فى جمل سقطت منى كتير...رغم إنى كنت هموت وأقف اسمع بقيتها
بعد ما بخلص ورقى فى شؤؤون الطلبة كان لازم اروح اختم اوراق وامضي حاجات فكنت بروح لمكتب العميد وارجع تاني لشؤؤون الطلبة يتأكدوا إن الحاجة تمام علشان أعمل الاجراء التاني وهكذا الحال
وفى سكتى ما بين مبنى شؤون الطلبة ومبنى العميد حصلت المشاهد ، ومنها المشهد التانى وأنا داخلة على مبنى العميد -تحت العواميد قدام الباب كدة ، اتنين ولد وبنت -:
هي:لا يا أحمد انا بحط الكونسيلر قبل كريم الاساس..وده مش بودرة ...
أحمد :ايوة يا حبيبتى بس شكله مجير أوى عليكي
سمعت الكلام ومجبتيش منطق..عيب عادي سيبك انتى الحقي اطلعي اجري اامضي الحاجة ...والحمد لله مضيت الورقتين بسلاسة وبدون اى مشاكل...وطلعت اجري علشان اكمل بقيت الحاجة وابقة الحق وكيل الكلية فقلت انزل اصور الأول الحاجات وقدام المكتبة لقيت الشباب الحلو واقف وبيتناقشوا مناقشة ساخنة جدا حول كيفية الاستفادة من الاجازة فى كل ماهو صحي ومنتج:وكان المشهد التالت:
الباشا الفصيح: ايوة يا جماعة إنتم هتيجي عندى فى الكينج ..ومتخفوش يا بنات إنتم هتبقوا فى الدور التاني وأحنا فى الارضي..بييس...قشطة..احسن من حوار العجمي...نخليها يومين فل كدة
لا ما شاء الله عليه فكيك وبيفكر ...يا رب خلص التصوير ده على خير مكنوش ورقتين ..والحمد لله خلصت التصوير الحق اجيب الدمغات وكان المشهد الرابع:
الولد الشطورة أبو برمودا وسليبر مربوط فيه سلسلة كبيرة يظهر بتاعة كلب كان معدى ولا حاجة:
انت بس اكتبلي التعريفات والمصطلحات ..اخلص طلعت روحي مش هنلحق كدة نخش اللجنة...لما أشوف البت سماح ضبتطلللي القصايا ولا ايه هى روخراااا
بصيت وابتسمت لا والله بيتعب ..فعلا لكل مجتهد نصيب والحمد لله سكتنا خضرا ..مفيش طوابير ولا زحمة خلصت المسألة بسرعه ..وجري علشان الحق شؤون الطلبة وعلى باب المدرج كان المشهد الخامس :
هو: نعم ناااااعم....انتى بتقول ايه
هى: زى ما بقولك يا روح .....*شوف انت بقة انا جبت أخري وبقولك ايه اتلم بدل ما انت عارف ...علشان مصلحتك يعنى ...بدل حواراتك ال......تييييييييييييييت ....تيييييييييييييييييين ...تييييييييييييييت
ما شاء الله ..هو ده اللي بنسميه يا جماعة "تمكين المراة" ...وأسس حل المنازعات والحوار..تشوفها وهى بتتكلم بهدوء بصوتها الحنون وحركات الوجه الملائكي ...الواحد بتيجي عليه أوقات بيطنط وهو مش عارف يقول ايه بيكون فى أمس الحاجة لدعم قاموسه اللغوي
ما علينا يلا، طلعت الحمد لله بسلام الدور التاني فى مكتب شؤؤون الطلبة ولقيتهم سبحان الله لسه بيكملو الأحاديث ...يظهر محبوش الموضوع يفوتنى فاكيد اكيد استنونى لما اجي علشان يكملو المواضيع واللي مسحتها علشان الصداع بس وطبعا أخدت بعضي على مكتب العميد وفى طريقي لقيت اصحاب المشاهد السابقة لسه فى مكانهم
وكان الولد اياه والبنت اللي معاه بتوع المشهد التاني: على باب مبنى العميد:
هو: اسمعى انا عايزك تجربي النهاردة ...........كذا.......... ولو معرفتيش اتصلي بيا
هى: انت شايف كدة
!!!!!!!!!!!!!!!!!!!!!!!!!!
بغض النظر هو قال ايه ...ممكن يكونوا مخطوبين أو متجوزين عادي جدا...والله انا مش معقدة أوى كدة ..يمكن عادي بس مش فى الحرم الجامعى ..ٌقدام مكتب العميد..طيب بصوت وشوشة ..ليه أنا اسمع...والغريب انى لما اتسمرت فى مكانى للحظة والورقة وقعت منى ..الاتنين بصولى حتة دين بصة..فاعتذرتلهم وطلعت اجري
وأنا بسمع الولد بيقول: الناس بقت غريبة أوى
!!!!!!!!!!!!
--------------------------
المهم الحمد لله: خلصت كل حاجة ..يلا يدوبك اروح اسلم الاوراق واحجز الكورس...بس الاول اصور كام نسخة للإحتياط واجب برده
اوكانت لسه مجموعة شباب الغد الواعد مازالت واقفة ومواصلة حوار من أجل انطلاقة صيفية منتجة
!!!!!!!!
طيب من هنا لبكرة هنرتب على تليفونات....هو خالد اتأخر ليه...هو لسه ماشي مع العيال الفاكسانة دول...ايوة بصوا ..نفخونى الصبح وخصوصا البت اللي اسمها ...الخ الخ
------------------
مديت الخطي بسرعة وانا مش مصدقة نفسي أنى بسمع وسمعت كل ده...يا سلام على لجان الامتحان كل ده كان بيتقال قدام اللجنة ومكنتيش باخد بالي منه...وأنا اللي زمان كنت فاكراهم بيراجعوا مع بعض..انا دلوقتى عرفت ليه بيقولو ايام الكلية وبيغنوا بايام وبعيال المجمع ...ياااه الواحد ميعرفيش قيمة الحاجة إلا بعد ما بضيع منه
كنت فيين أنا من حوارات المجمع .....وعجبي
No comments:
Post a Comment