يا تري..يا هل تري ..الشيطان أكثر معرفة منا بالله!!!!!

كل يوم بنستعيذ من الشيطان الرجيم، ولو شفنا حد وحش بنقول عليه علطول ده شيطان...يا ساتر..ده ميعرفيش ربنا... أعوذ بالله

طيب ليه؟ مين ده اللي الناس كلها بتكلم عنه!! ..

وكتب وحواديت وقصص اتتألفت وكان هو بطل أحداثها...يعنى مشفتيش حد إى ولا لازم بيذكره..ودايماً بالشر –حتى ولو مش بيؤمن بأى دين- هو فعلاً الشيطان وحش أوى كدة؟

بصراحة أنا شايفة إننا ظالمينه جداًمين قال إن الشيطان ميعرفيش ربنا؟ يعنى إزاى؟ ...

ده كان طاووس الملائكة..حاجة تجنن

طيب أنا راضية ذمتك...حكم عقلك كدة معايا براحة،

واحد بيقول لربنا –سبحانه وتعالي-: " وَمَنْ يَتَّخِذِ الشَّيْطَانَ وَلِيًّا مِنْ دُونِ اللَّهِ فَقَدْ خَسِرَ خُسْرَانًا مُبِينًا " [النساء:119]،يعنى واحد بيقول إن اللي هياخد ولى غيرك يا ربنا ...هيخسر خسارة كبيرة وظاهرة جداً...يعنى حاجة فضايح كدة..

فمنين ميعرفيش ربنا...والله بيضحكوا علينا وبيكذبوا كمان..

وقال ايه لما روحت شفت فى مكان اسمه "جبل الرحمة عرفات " فى السعودية واللي طبعا زى ما أغلبنا يعرف إن أركان الحج خمسة ، منها اثنان متفق عليهما عند جميع الأئمة)، المهم ما علينا،

إن فى المنطقة دى وما حواليها بتحصل فيها مناسك الحج ومن ضمنها "رمي الجمار " –أو الجمرات زى ما إحنا عارفينها بعاميتنا- الجمار جمع جمرة وهي : الحجر الصغير ، ورميها قذفها وهذا في اللغة ، وأما في الشرع فالمراد برمي الجمار هو : القذف بحصى معين في زمان معين ومكان معين -فى الحج طبعاً-.

المهم إنى فوجئت بيهم بيعلموا تجديدات رهيبة فى المكان كله –وما شاء الله تسهيلات كبيرة وحاجات رائعة، يا رب عمرها كمان وكمان- ومن ضمنها بيعملو حاجة زى تراكات أدوار –أو مبنى كبير من عدة طوابق مفتوحة – علشان الناس ترمى منه الجمرات منعاً للزحام الشديد فى يوم رمي الجمرات.

فلقيت نفسي بتخيل المنظر، ولفكر ...يا حرام كل الناس دى رايحة ترمي الغلبان ده بالطوب ده كله، ده الواحد لما بتوقع عليه طمطماية بييتوجع أسبوع..يااااه ...يانهارلو...

وليه يعنى كل دول يرموه، هم يعرفوه منين يعنى، حد شافه مثلاً....محدش فكر يسأل سؤال هو أحسن منه فى ايه؟

غصب عنى فكرت، يعنى قد كدة الشيطان يعرف ربنا –عزوجل- وأكلت نفسه الغيرة إن ربنا فضل عليه كائن أخر!!" قَالَ أَنَاْ خَيْرٌ مِّنْهُ خَلَقْتَنِي مِن نَّارٍ وَخَلَقْتَهُ مِن طِينٍ" [الأعراف:12]، ...للدرجة دى غيرته كانت كبيرة...

يا حرام الصدمة عليه كانت أكبر من إنه ممكن يتخيل إن فى حد ممكن يكون فى مكانة أعلى منه عند ربنا!! يا نهار أبيض..مش ممكن ...للدرجة دىوبسسبب ذنب واحد عمله، أنه مقدرش يسمك نفسه من كتر الغيرة فأخدته العملية ونأححت عليه نفسيته فتكبر!!...وعلشان كدة اطرد من رحمة ربنا؟ وعلشان كدة كل أمة لا إله إلا الله بترميه بالطوب!!!

يا "سلام ...علي كدة انا محتاجة كل يوم أنزل من بيتنا معايا شوال طوب...أحدف بيه الناس كلها...مين مش معوج ولا مين مش شايف نفسه ...دى الأرض اشتكت من كتر ما اتهد حليها من طنطيط البشرطيب...ده واحد اتعوج علي نفسه...

يعنى طيب نفسر بايه ذنوبنا إحنا: ظلم وقتل وحروب وأسلحة دمار شامل ونهب ....وظلم الإنسان لأخيه الإنسان والذل والهوان اللي بنسقيه لبعض..ليه إحنا وحشين أوى كدة...ليه ...الخ الخ ..الخ

يا حرام الشيطان مأقتل حد فبنا...بس بسبب مشاعر وأفكار معرفيش يسيطر عليها، تسبب إنه طرد نفسه من رحمة ربنا..مش علشان عظمة ذنبه لكن علشان عارف عظمة من عصي...وعارف إنه حياته كلها مش تكفى حقد إن حد غيره أخد مكانه عند ربنا أعلى منه ، فطلب زيادة علشان ينتقم من ذرية آدم كلها ..يعنى مكفهوش آدم " "قَالَ أَنظِرْنِي إِلَى يَوْمِ يُبْعَثُونَ" [الأعراف:14] ...

وعلشان يثبت إن آدم وذريته مش احسن منه " قَالَ فَبِمَا أَغْوَيْتَنِي لأَقْعُدَنَّ لَهُمْ صِرَاطَكَ الْمُسْتَقِيمَ " [الأعراف:16]

يااه للدرجة دى ربنا عظيم....للدرجة دى رضاه ومعيته حاجة كبيرة ...الشيطان مقدريش يتخيل إنه يبعد عنهايا ساتر هو مين الشييطان اللي بجد...يا ربي كام واحد فينا بيغلط وبيعتذر..كام واحد فينا .بيظلم أخيه الإنسان ....كم من مظالم على باب المحاكماللهم إنى أعوذ بك من شرور أنفسنا..وأعوذ بك أن أظلم أو أظُلِم ....يا عفو أشهدك إنى عفوت عن من ظلمنى فاعفو عنى

--------Amira---

Mon. June 8, 2009