السياسة ...االدين...ولا التنمية

هم طبعا كلهم وجوه لعملة واحدة...بس قبل السياسة لازم تيجي التنمية...مش ينفع أتكلم وأنا ضعيف وجاهل


البقاء للأقوى وللصوته أعلى...ودلوقتى التنمية والعلم هى القوة المحركة والجالبة للفلوس والسطوة

كتير فى بلدى بيتكلموا عن الإصلاح السياسي وبتسأل كتير إنتى ميولك السياسية إيه...وكدة...وردي بيكون أبسط مما يمكن أن يستوعبوه..أنا مليش أى ميول سياسية ومش أحب أشتغل فى السياسة ولا لى فى حوارتها نهائياً...أنا سياستى التنمية ..ودينى العمل ومذهبي العلم...وبس ...

ومعرفش حاجة تانية عن الدنيا...

ناس تتكلم وتقول التغير لأجل التغير هيعمل فرق للناس وهيحري الدم فى الوريد ويدى أمل للغلابة نحو مسيرة للتقدم...كلام جميل مقدرش أقول حاجة عنه ...بس إيه البدائل فين الكوادر ...مين القادر على إختيار هذه الكوادر...لا لا ...أنا محتاجة أكبر وأفهم...وأحب أشوف الدنيا ماشية إزاى وأتعلم وأعيش مع غيري وأعرف أكتر ....وأشتغل على حالي كتير....وأبنى مداركي ...وبعدين الوعى هيجي لوحده...واللي أكيد منها الوعي السياسي...والمشاركة السياسية....لكن دلوقتى ولمدة عشرين سنة قدام مش بتهئلي إنى أحب أشتغل فى السياسة نهائي...

أنا بحب العمل التطوعى وبناء القدرات ...لأنى كل يوم بيعدى علي فيها بتعلم حاجة جديدة...ومن غير صداع السياسة اللي مهما أبحرت فيها مش هوصل لقرارها....أنا احب أشتغل مع القاعدة...مع الناس...من غير تكلف واصطناع ...وشد وجذب....أنا بحب التنمية بمفهومها الواسع...وعندى فوبيا نشرات الأخبار ...

أنا ملتى الحرية ..بعيد عن أى شعارات تكسر جناحى فى سما الفكر ....ولا تمنعنى إنى أمشي على بساط قوس قزح بكل ألوانه ودرجاته...

بحب أعيش وبيجرحنى كتير إن ألاقي حد بيحجبنى عنه بسبب إختلافي عنه...أنا مش شايفة غير إنى إنسان...واللي قدامى إنسان..مجرد حرف فى مقطوعة دنيا الأنغام الواسعة بكل ألوان الموسيقي ...العذبة منها والصاخبة...

وبحب الرقص جدا...لكن بحب رقصتى للحياة..مش بطلب منك إنك ترقص معايا ..إلا إذا حبيت تشاركنى..ده اكيد يسعدنى...بس من فضلك مش تمنعنى

POSTED BY: AMIRA

AT 6:31 AM
FRIDAY, DECEMBER 28, 2007